१५ वैशाख २०७९
निर्माणाधीन धरान—चतरा—सिन्धुली—हेटौँडा(मदन भण्डारी) राजमार्गको निर्माणकार्य करिब अन्तिम चरणमा पुगेको छ। सरकारको मुख्य प्राथमिकतामा परेको मदन भण्डारी राजमार्ग( धरान—चतरा—सिन्धुली—हेटौँडा वैकल्पिक सडक) को निर्माण कार्य पछिल्लो समय तीव्र गतिमा भएपछि निर्माणले गति लिएको हो। राजमार्गको पश्चिम खण्डको काम तीव्र गतिमै भइरहेको र हालसम्म ९५ प्रतिशत बढी निर्माण कार्य सम्पन्न भइसकेको राजमार्गको पश्चिम खण्ड आयोजना कार्यालयले जनाएको छ।

सुनसरी, उदयपुर, सिन्धुली र मकवानपुरका भित्री उपत्यकाहरू जोड्दै पूर्व–पश्चिम राजमार्गको वैकल्पिक मार्गको रूपमा हेरिएको राजमार्गको पश्चिम खण्ड अन्तर्गत सिन्धुलीको भिमानदेखि हेटौँडासम्मको झन्डै ९५ प्रतिशत सडक निर्माणको काम सम्पन्न भइसकेको आयोजनाले जनाएको छ। ‘सडक निर्माणको कार्य अन्तिम चरणमा पुगेको छ,’ मदनभण्डारी राजमार्ग आयोजना पश्चिम खण्डका इन्जिनियर निरन्जन थापाले भने, ‘बागमतीको पुल समेत सुचारु भइसकेकाले सवारी आवतजावतमा समेत सहज हुँदै गएको छ।

सिन्धुलीको सदरमुकाम स्थित कमलामाई नगरपालिका ४ खट्टारदेखि धुराबजारसम्मको ६ किलोमिटर सडक निर्माणमा लामो समयदेखि राजमार्ग अन्यन्त्रैबाट लैजानुपर्ने मागसहित अवरोध हुँदै आएको थियो। राजमार्गको नक्साङ्कनको विषयलाई लिएर झन्डै चार वर्ष अगाडिदेखि विवाद भई निर्माण हुन नसकेको राजमार्गमा हाल विवाद समाधान गरी निर्माणको कार्य अन्तिम चरणमा पुगेको हो।

राजमार्ग निर्माण गर्दा कमालमाई नगरपालिका ६ धुराबजारका बासिन्दा विस्थापित हुनुपर्ने भन्दै अन्यन्त्रबाट विकल्प खोजेर राजमार्ग लैजान माग गर्दै स्थानीयले अवरोध गर्दा चार वर्षदेखि विवादित थियो। हाल धुराबजारको सिरानदेखि खट्टारसम्म राजमार्गको चौडाइ घटाएर सोही स्थानबाट निर्माण गर्ने सहमति भएसँगै बजार क्षेत्रमा कालोपत्रे सुरू भएको छ। मदनभण्डारी राजमार्गको पश्चिम खण्ड अन्तर्गत सिन्धुली सदरमुकामस्थित धुराबजारदेखि खट्टार क्षेत्रसम्मको ६ किलोमिटर चौडाई घटाएर ९ मिटरमात्रै कालोपत्रे गर्ने सहमति अनुसार काम भइरहेको छ। यस राजमार्गको अन्य क्षेत्रमा नालाबाहेक पिच मात्रै ११ मिटर कायम गरिएको छ।

धुराबजारबाट लोकतान्त्रिक चोक हुँदै अस्पतालरोडबाट विपी राजमार्गको शान्तिनगरचोकमा जोडिने गरी राजमार्गको काम भइरहेको पश्चिम खण्ड आयोजनाका इन्जिनियर निरन्जन थापाले जानकारी दिए। ‘सामान्य विवाद अझै आइरहेको छ,’ उनले भने, ‘काम गर्नेक्रममा विवाद समाधान गरेरै काम गर्छौ।’ पश्चिम खण्डमा सिन्धुलीको कमलामाई नगरपालिकाको भीमानदेखि मकवानपुरको हेडौँडा महानगरपालिका–६ चौगडासम्मको कुल ११५ किलोमिटर सडक पर्छ। २०७३ साल कार्तिकमा सम्झौता भएको उक्त राजमार्गको निर्माण गर्न विभिन्न समयमा समयावधि थप भइ २०७७ साल फागुनभित्र सम्पन्न गर्नुपर्नेमा कोरोनाका कारण निर्माणको अवधि पुनः थप गरी काम भइरहेको आयोजनाले जनाएको छ।

राजमार्गको निर्माणको जिम्मा पश्चिम खण्डमा कालिका, स्वच्छन्द, रकेन जेभी काठमाडौंले र पूर्वी खण्डको जेट आइ.इसी शर्मा एण्ड लामा जेभीले निर्माणको जिम्मा लिएको छ। ११ मिटर चौडाइ रहेको उक्त सडक दुई पत्रमा पिच भएको छ। पहिलो लेयरमा ११ मिटर चौडाइमै पिच भएको र त्यसमाथि ७ मिटर चौडाइमा दोस्रो लेयरमा पिच भएको आयोजनाले जनाएको छ।

Author

  • यो वेबसाइट अनलाईन कान्तिपुर डट कमको आधिकारिक न्युज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सूचना प्रविधि, भिडियो तथा जीवनका विभिन्न आयामका समाचार र विश्लेषणलाई समेट्छ।

By

यो वेबसाइट अनलाईन कान्तिपुर डट कमको आधिकारिक न्युज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सूचना प्रविधि, भिडियो तथा जीवनका विभिन्न आयामका समाचार र विश्लेषणलाई समेट्छ।

Leave a Reply

Your email address will not be published.